نشر الاعلامي باسم يوسف منشور على موقع التواصل الاجتماعى "فيسبوك" منتقدًا الجيش المصري و يصفه بالسفاحين و العصابة "المسعورة" كما قام بوصف السيسى بالـ"مشهلاتى" الذى يسهل لهم عملياتهم.
و كتب باسم يوسف خلال منشوره : "صور المجند اللي واقف على عربية و بيسرح يبيع سندوتشات.. عشان كده ده مش اسمه بيزنس جيش.. الغلط هنا مش كلمة بيزنس. الغلط هنا كلمة جيش. ده مش جيش".
و اكمل باسم : "دول عصابة مسعورة على الفلوس مثبتين البلد بالسلاح و دورهم الوحيد في الحياة انهم يصحوا الصبح بدري يشوفوا حيدوروا السبوبة منين. ده مش جيش دول حبة سماسرة على مقاولين على مضاربين على تجار لابسين يونيفورم مموه وبيروحوا شغلهم يقبضوا الغلة. ده حتى السماسرة و المقاولين بيدفعوا ضرائب غاز كهربا جمارك تأمينات مرتبات عدلة للعمال بس دول لا".
و كتب باسم يوسف مكملاً : "يا ريتهم مثلا بيشتغلوا من حر مالهم لا دول بيغرفوا من ميزانية الدولة و بيستولوا على ارض الدولة و بيشغلوا بالسخرة مجندين غلابة من اولاد الدولة و بعدين بكل بجاحة يطلعوا يقولوا "ده عرق الجيش الدولة مالهاش دعوة بيه".
اكمل باسم يوسف متحدثاً عن السيسى : "السيسي ماهو الا المشهلاتي اللي بيسهل البيزنس للسفاحين دول لكن المنظومة كلها فاسدة و ضارب فيها السوس.. ده مش جيش. عشان كده سهل يبيع الارض و يقبض على اللي يعترض عشان ده بيوقفله البيزنس".
و اكمل : "كلمات زي جيش و قوات مسلحة طول عمرها عندها قدسية عند الناس لكن انتم مرمغتوها في التراب عشان كروشكم تكبر اكتر.. دول مش جيش دي ميليشات مسلحة و لا بيهمها وطن و لا ارض و لا حدود و اللي بيموت على الحدود فعلا هو المجند اللي موقفينه على عربية السندوتشات".
و اختتمت حديثه كاتباً : "بس انتم واقفين هنا في محلاتكم و مدارسكم و مصانعكم و مكاتبكم بتشوفوا ازاي تنهبوا النهيبة الجاية و معاها واخدين شباب مصر كلهم رهينة في سجونكم يوم تقبلوا فيهم فدية و يوم تقفلوا عليهم لغاية لما يموتوا و اي مبادرة اي بديل مدني اي بديل جن ازرق مالوش اي تلاتين لازمة طول ما المنظومة دي موجودة و بتمص دم البلد. و يا ريتهم بيشبعوا".
